ក្រសួងឧស្សាហកម្ម វបន និងគណៈកម្មាធិការជាតិផលិតភាពសេដ្ឋកិច្ចកម្ពុជា ពិភាក្សាអំពីកិច្ចសហប្រតិបត្តិការដើម្បីបង្កើនផលិតភាពសេដ្ឋកិច្ចកម្ពុជា
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី១ ខែធ្នូ ឆ្នាំ២០២៣ បានទទួលជួបគណៈប្រតិភូនៃអគ្គលេខាធិការដ្ឋាន គណៈកម្មាធិការជាតិផលិតភាពសេដ្ឋកិច្ចកម្ពុជា ដឹកនាំដោយ ឯកឧត្តម ស៊ីសុវត្ថិ ដួងច័ន្ទទោ និងបានពិភាក្សាអំពីការពង្រឹងកិច្ចសហប្រតិបត្តិការដើម្បីលើកកម្ពស់ផលិតភាពសេដ្ឋកិច្ចរបស់កម្ពុជា។
កិច្ចប្រជុំបានផ្តោតលើកិច្ចខិតខំប្រឹងប្រែងរួម ដើម្បីរួមចំណែកដល់ការអនុវត្តក្របខ័ណ្ឌគោលនយោបាយជាតិផលិតភាពសេដ្ឋកិច្ចកម្ពុជា ឆ្នាំ២០២២-២០៣៥ និងផែនការមេផលិតភាពជាតិ ដែលត្រូវបានសហការរៀបចំដោយអង្គការផលិតភាពអាស៊ី។
ឯកឧត្តរដ្ឋមន្ត្រី បានបញ្ជាក់ការប្តេជ្ញាចិត្តរបស់ក្រសួង ក្នុងការកៀរគរធនធាន ដើម្បីគាំទ្រដល់មជ្ឈមណ្ឌលជាតិផលិតភាពកម្ពុជា ដែលជាអង្គភាពក្រោមឱវាទក្រសួងទទួលបន្ទុកលើការលើកកម្ពស់ផលិតភាពវិស័យឯកជន។ ឯកឧត្តបានបន្ថែមថា ក្រសួងកំពុងពិនិត្យការងារលើកកម្ពស់ផលិតភាពក្នុងខ្សែច្រវាក់ផលិតកម្មទាំងមូល រួមទាំងតាមរយៈការបណ្តុះបណ្តាលនៅនឹងទីតាំងរោងចក្រ-សហគ្រាស ការប្រឹក្សាធុរកិច្ច និងផលិតភាពហេដ្ឋារចនាសម្ព័ន្ធផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ជាដើម។
ឯកឧត្តបានជម្រាបជូនគណៈប្រតិភូថា ក្រសួងក៏កំពុងពិនិត្យលទ្ធភាពក្នុងការអភិវឌ្ឍតំបន់ប្រមូលផ្តុំឧស្សាហកម្ម ដែលអាចឱ្យរោងចក្រ-សហគ្រាសបង្កើនផលិតភាព ដូចជាផលិតវេនយប់ ឬផលិត២៤ម៉ោង និងថា សហគ្រិនខ្មែរក៏នឹងរួមចំណែកគាំទ្រដល់រធុរកិច្ចកាតាលីករ (market catalysts) ដើម្បីលើកកម្ពស់ប្រព័ន្ធអេកូឡូស៊ីសហគ្រាសធុនតូច និងមធ្យមផងដែរ។
ឯកឧត្តម ស៊ីសុវត្ថិ ដួងច័ន្ទទោ បានបញ្ជាក់ពីការប្តេជ្ញាចិត្តរបស់គណៈកម្មាធិការជាតិផលិតភាពសេដ្ឋកិច្ចកម្ពុជា ចំពោះកិច្ចសហប្រតិបត្តិការ រួមទាំងការចែករំលែកទិន្នន័យនៅក្នុងប្រព័ន្ធអេកូឡូស៊ីផលិតភាពជាតិ ការអភិវឌ្ឍសមត្ថភាពតាមរយៈការសហការរៀបចំសិក្ខាសាលា ការផ្សព្វផ្សាយតាមទីសាធារណៈ និងយុទ្ធនាការនានា ក្នុងគោលបំណងលើកកម្ពស់ផលិតភាពរបស់កម្ពុជានៅលើឆាកអន្តរជាតិ។
ឯកឧត្តមរដ្ឋមន្ត្រី បានលើកទឹកចិត្តឱ្យអគ្គលេខាធិការដ្ឋាន រៀបចំកិច្ចប្រជុំរួមជាមួយក្រសួងពាក់ព័ន្ធ ដើម្បីពង្រឹងកិច្ចសហប្រតិបត្តិការ ដោយសង្កត់ធ្ងន់ថា ផលិតភាពគួរត្រូវបានចាត់ទុកជាការវិនិយោគ មិនមែនជាចំណាយចរន្តនោះទេ។